ਤਾਜਾ ਖਬਰਾਂ
ਪਾਕਿਸਤਾਨੀ ਪੰਜਾਬ ਦੇ ਸਿੱਖਿਆ ਮੰਤਰੀ ਰਾਣਾ ਸਿਕੰਦਰ ਹਯਾਤ ਨੇ ਪੰਜਾਬੀ ਸੰਗੀਤ ਦੇ ਦੋ ਵੱਡੇ ਨਾਵਾਂ, ਦਿਲਜੀਤ ਦੋਸਾਂਝ ਅਤੇ ਕਰਨ ਔਜਲਾ ਦੀ ਸ਼ਾਨਦਾਰ ਪ੍ਰਸ਼ੰਸਾ ਕੀਤੀ ਹੈ। ਲਾਹੌਰ ਵਿੱਚ ਹੋਈ ਇੱਕ ਪੰਜਾਬੀ ਕਾਨਫਰੰਸ ਵਿੱਚ ਬੋਲਦਿਆਂ, ਰਾਣਾ ਸਿਕੰਦਰ ਹਯਾਤ ਨੇ ਕਿਹਾ ਕਿ ਇਨ੍ਹਾਂ ਕਲਾਕਾਰਾਂ ਨੇ ਪੰਜਾਬੀ ਬੋਲੀ ਅਤੇ ਸੱਭਿਆਚਾਰ ਨੂੰ ਆਲਮੀ ਪੱਧਰ 'ਤੇ ਪ੍ਰਚਾਰਿਆ ਹੈ, ਜਿਸ ਨਾਲ ਪੂਰੀ ਦੁਨੀਆ ਵਿੱਚ ਪੰਜਾਬੀਆਂ ਦਾ ਮਾਣ ਵਧਿਆ ਹੈ।
ਮੰਤਰੀ ਹਯਾਤ ਨੇ ਸਪੱਸ਼ਟ ਕੀਤਾ ਕਿ ਪੰਜਾਬੀ ਕਲਾਕਾਰ ਭਾਵੇਂ ਪਾਕਿਸਤਾਨੀ ਪੰਜਾਬ ਨਾਲ ਸਬੰਧਤ ਹੋਣ ਜਾਂ ਭਾਰਤੀ ਪੰਜਾਬ ਨਾਲ, ਉਨ੍ਹਾਂ ਸਾਰਿਆਂ ਨੇ ਸੰਗੀਤ ਰਾਹੀਂ ਵਿਸ਼ਵ ਪੱਧਰ 'ਤੇ ਪ੍ਰਭਾਵ ਪਾਇਆ ਹੈ।
"ਪਹਿਲਾਂ ਲੋਕ ਪੰਜਾਬੀ ਗੀਤਾਂ ਨੂੰ ਬਹੁਤਾ ਮਹੱਤਵ ਨਹੀਂ ਦਿੰਦੇ ਸਨ ਅਤੇ 'ਪੇਂਡੂ ਗੀਤ' ਜਾਂ 'ਨਸੀਬੋ ਲਾਲ ਲਗਾ ਦੋ' ਵਰਗੇ ਸ਼ਬਦ ਵਰਤਦੇ ਸਨ, ਪਰ ਹੁਣ ਹਾਲਾਤ ਬਦਲ ਗਏ ਹਨ। ਅੱਜ, ਕਰਨ ਔਜਲਾ ਅਤੇ ਦਿਲਜੀਤ ਨੇ ਕਮਾਲ ਕਰ ਦਿੱਤਾ ਹੈ," ਰਾਣਾ ਸਿਕੰਦਰ ਹਯਾਤ ਨੇ ਜ਼ੋਰ ਦੇ ਕੇ ਕਿਹਾ।
ਉਨ੍ਹਾਂ ਨੇ ਵਿਸ਼ੇਸ਼ ਤੌਰ 'ਤੇ ਦਿਲਜੀਤ ਦੋਸਾਂਝ ਦੀ ਪ੍ਰਸਿੱਧੀ ਦਾ ਜ਼ਿਕਰ ਕਰਦੇ ਹੋਏ ਕਿਹਾ ਕਿ ਅੱਜ-ਕੱਲ੍ਹ ਦੁਨੀਆ ਭਰ ਵਿੱਚ ਦਿਲਜੀਤ ਹੀ ਚਲਦਾ ਹੈ।
"ਪਾਕਿਸਤਾਨ 'ਚ ਵੀ ਉਹ ਓਨਾ ਹੀ ਪ੍ਰਸਿੱਧ ਹੈ ਜਿੰਨਾ ਭਾਰਤ ਜਾਂ ਬਾਕੀ ਦੁਨੀਆ ਵਿੱਚ। ਅੱਜ 'ਗੋਟ' (Goat) ਚਲਦਾ ਹੈ, 'ਸਿਫ਼ਰ ਤੇ ਸਫ਼ਰ' (Sifar te Safar) ਚਲਦਾ ਹੈ। ਸਾਨੂੰ ਇਸ ਗੱਲ ਦਾ ਮਾਣ ਹੈ ਕਿ ਦਿਲਜੀਤ ਦੋਸਾਂਝ ਨੇ ਪੂਰੀ ਦੁਨੀਆ ਨੂੰ ਪੰਜਾਬੀ ਸੰਗੀਤ ਵੱਲ ਖਿੱਚਿਆ ਹੈ," ਉਨ੍ਹਾਂ ਕਿਹਾ।
ਰਾਣਾ ਸਿਕੰਦਰ ਹਯਾਤ ਨੇ ਦੱਸਿਆ ਕਿ ਉਹ ਪੰਜਾਬੀ ਬੋਲੀ ਬੋਲਣ 'ਤੇ ਮਾਣ ਮਹਿਸੂਸ ਕਰਦੇ ਹਨ ਅਤੇ ਇਨ੍ਹਾਂ ਕਲਾਕਾਰਾਂ ਦੇ ਕਾਰਨ ਹੀ ਅੱਜ ਬਹੁਤ ਸਾਰੇ ਲੋਕ ਪੰਜਾਬੀ ਸੁਣਨ ਅਤੇ ਬੋਲਣ ਲੱਗ ਪਏ ਹਨ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਉਹ ਹਰਿਆਣਵੀ ਬੋਲੀ ਨੂੰ ਵੀ ਪਸੰਦ ਕਰਦੇ ਹਨ।
Get all latest content delivered to your email a few times a month.
